La smonta la prossima?
Una vita in corriera
de Davide Destradi
Insoma monto in corriera, me sento e speto che la parti ma inveze de moverse riva Diego Manna che ciol un microfono e se meti contar de libri scriti, de libri publicadi, de libri insomma! Ma in coriera? Ma de quando ste robe? Xe come quele gite che i te inzingana per pochi soldi e dopo in pulman i tenta de venderte pignate, cogome, covertori, vide e tampagni e adesso anche libri?
Bon ah, qua semo e stemo a veder come che va a finir quando ecco che riva el cucer… come chi xe el cucer… el safér o sofér dai… ma come… bon, quando ecco che riva l’autista che inveze de andar a sentarse al posto de guida el se fa dar el microfono de Diego e el se meti a contar un poche de monade che xe successe in tanti ani de percorsi per zità. Ridade, ridade e ancora ridade e penso che bel che saria ogni volta che te monti in coriera che ghe fussi un autista che te conta qualcossa de divertente, el viagio saria più piacevole e per tuta la durata no te pensassi che te son in quela coriera perchè te devi andar a lavorar, o a scola, o in qualche malora che te gavessi preferido star sul divano a vardar la television.
Xe cussì che con grande emozion el mulòn Davide, autor del libro oltre che autista de coriere urbane, ne invoia a butarse a copofitto in tela letura de sto suo libro “La smonta la prossima? Una vita in corriera”, 142 pagine de puro divertimento, de sana alegria, de classico morbin triestin edito da la domacia casa editrice “White Cocal Press” de Diego Manna che za questa xe una garanzia! Sto libro xe come un viagio imaginario da un capolinea a quel altro, dentro una coriera de la Trieste Trasporti, dove se vedi passar un mucio de personaggi diversi, che con i sui gesti, le sue parole, i sui vestiti o le sue domande, ga attirado l’atenzion dei autisti de ogni età. Da queste sitauazioni xe sta zercado de dar volutamente risalto a quel che de goliardico podeva esserghe in ogni situazion, un bel modo per veder l’autista come un amico che svolgi un lavor pesante, con orari spesso impossibili, messo drio quel volante per portarne torzio e condivider attimi de vita.
El titolo de sto libro del mio amico Davide, eh si perchè mi e Dede gavemo condiviso el banco de scola al Da Vinci senza più perderse de vista, me da el pretesto per ricordarghe a tuti i triestini, sopratuto e quei più giovani che el triestin in coriera
no sali e no scendi ma monta e smonta
no prendi l’autobus ma ciapa la coriera
e no oblitera l’abbonamento ma timbra la tessera
E dopo queste perle de cul-tura, un invito a cior el lirbo, no ve pentirè e bona divertente lettura a tutti quanti!
Massimo Barbo – TuttoTrieste.net
El libro podé trovarlo in libreria, sul sito ufficiale clicando qua e e su Amazon cliccando qua anche in formato kindle cliccando qua.