Quei ani de guera quasi finida

di Luciano Postogna

Papà, ciapà dei ‘mericani, col grado de sergente,
lavorava sforzà, in Nord Africa, pe un grosso pec francese.
De zio Ciano, partì in Croazia, no se saveva gnente,
perso lazò tra i monti ormai de qualche mese.

Mi, coi cavei panocia, iero cocolà dei gnochi
nel bar, che mama lavorava, sul canton de via Milano.
Se vantava zia dell’ultimo moroso, – sto qua xe un coi fiochi -:
Hano, uficial distinto, alto, biondo e anca prussiano.

Tegniva el cruco, nela vila de Opicina, un bel giardin,
un can lupo, un camerier e ‘l cogo in cusina.
De sovente el ne ciamava a magnar qualche spuntin,
de quel ben de Dio stipà soto in cantina.

Un giorno però ga comincià a cambiar la vita,
xe rivà i soldai co’ le stele rosse sula bustina
e me ricordo che a casa de nona Ieti, visavì de Trita,
iera Hano stremà de paura, nel canton dela cusina.

Spoià dela montura, in mudande e cola pele bianca,
i ghe provava, come se fa del sarto, le strazze de zio Ciano.
Vestì come un qualunque e con la vose stanca,
el ghe diseva a tuti – danche, file danche – e noi, – adio Hano -.

In quei giorni, sule finestre che varda in via d’Azelio,
coreva nono, coreva mama, coreva zia e anca siora Gema.
Lui col drapo roso zigava – viva Tito -, insieme con sior Stelio,
lore de sponda, – viva l’Italia – , col tricolor e l’regio stema.

Xe passai quaranta giorni e le acque se ga un sciantin calmà,
nel bar de mama nisun ziga più “achtung”, nisun ziga più “stoi”,
mi, sempre coi cavei panocia, vegno ancora sbrazolà,
ma inveze che “clain chind” i me ciama “litel boi”.