La botega per le babe

e quela per i omini

A Trieste xe sta pena verta una nova botega dove le babe pol sceglier e comprarse l’omo ideale, el suo principe azzurro, l’omo dei sui sogni.

In entrata xe una tabela con le istruzioni su come che funziona sta botega:
1) Se pol visitar el negozio SOLO UNA VOLTA;
2) Ghe xe in tuto 6 piani e le carateristiche dei omini migliora più che se va in su;
3) Se pol sceglier qualsiasi omo in un pian opur decider de andar avanti per el pian de sora;
4) Una volta deciso de andar al pian de sora no se pol più tornar indrio.

Una baba decidi de ‘ndar a veder sta nova botega proprio per trovarse un compagno ideale.

Al primo pian una tabela sora de la porta disi: “Qua xe omini che ga un lavor”.

La baba decidi de andar a veder el pian de sora.

Al secondo pian la tabela sora de la porta disi: “Qua xe omini che ga un lavor e che i adora i fioi”.

La baba decidi de andar avanti al pian de sora.

Al terzo pian la tabela sora de la porta disi: “Qua xe omini che ga un lavor, i adora i fioi e i xe bellissimi”.

“Wow” – pensa la baba ma no contenta la decidi de andar ancora avanti.

Al quarto pian la tabela sora de la porta disi: “Qua xe omini che ga un lavor, i adora i fioi, i xe bellissimi e i xe bravissimi a far i lavori de casa.”

“Incredibileee!”, ziga la baba, “No rivo resister!”. Ma, dito e fato, la pensa un atimo e dopo la decidi de andar a veder ancora avanti.

Al quinto pian la tabela sora de la porta disi: “Qua xe omini che ga un lavor, i adora i fioi, i xe bellissimi, i xe bravissimi a far i lavori de casa e i xe estremamente romantici”.

La baba se sta squaiando, la xe fortemente tentada de restar e zercarse un omo in sto pian. Inveze la speta un momento e dopo la decidi de andar avanti e de rivar fin a l’ultimo pian.

El cartel del sesto e ultimo pian disi: “Te son la visitatrice n.31456112 de ‘sto pian, qua no xe nissun omo, questo pian esisti solo per dimostrar come che sia impossibile far contenta una baba! Grazie per gaver scelto el nostro negozio!

Poco tempo dopo difronte a sta botega xe sta verta una Botega per omini in zerca de una baba.

In entrata xe la stessa tabela con le stesse istruzioni che xe in tela botega per le babe.

Al primo pian la tabela sora de la porta disi: “Qua ghe xe babe che adora far sesso”.

Al secondo pian la tabela sora de la porta disi: “Qua ghe xe babe che ama far sesso e no rompi mai i bobi”.

I piani dal terzo al sesto NO XE MAI STAI VISITADI DE NISSUN.