Diario de una baba

che ga pena ciapà

la patente

2 genaio:
yuhuuuu! Finalmente i me ga da la patente!
Finalmente posso guidar la mia machina senza dover star la a scoltar quel taza bisi de l’istrutor che nol fa altro che ripeter drio man: “Sta tenta! Senso vietato”, “Te sta ‘ndando contro man!”, “Ocio la veceta, frena, frenaaaa!”, e altre frasi compagne. Propio no so come go fato a soportarlo per do ani!

8 genaio:
La scola guida ga organizado una festa perchè go finido.
I istrutori se ga comosso. Uno ga dito che’l gavessi fato dir una messa de ringraziamento, un altro me pareva che’l gavessi i oci lustri e tuti i ga dito che i gavessi fato un brindisi per festegiar l’evento. Xe sta tuto sai colcolo, ma no penso che la mia patente meritava tanto.

12 genaio:
Me go comprà una machina!
Putropo però go dovesto lassarla in concessionaria che i me cambi el paraurti dedrio perchè co go provà ‘ndar fora go messo la retro inveze che la prima. Devi esser la mancanza de pratica visto che xe una stimana che no guido!

14 genaio:
Ecola finalmente la mia macchina nova.
Iero talmente contenta vignindo fora del concessionario che go deciso de far un giro. Evidentemente un mucio de altra gente ga avudo la mia stessa idea visto che gavevo drio un numero incredibile de automobolisti che i sonava come in un matrimonio! Go deciso de star al zogo e go calà la velocità da 10 a 5 km al’ora. Ai altri stà roba ghe ga piasso un casin visto che i se ga messo a sonar ancora de più.

22 genaio:
I miei vicini de quartier xe propio cocoli:
I ga messo tanti cartei con scrito in grande: “OCIO ale manovre”; i me ga da el postegio più grande e i ghe ga proibido ai fioi de vignir fora co fazo manovra. Penso pervia de no darme fastidio! Ghe xe ancora persone cocole in sto mondo.

31 genaio:
I altri automobilisti i sona drioman e i fa segni.
Penso che sia una roba cocola ma anche un cicinin pericolosa. Ghe ne iera un che me voleva dir qualcossa ma no trovavo el boton per tirar zo el finestrin. Per zercar el boton roba che tiro zo un mato ma per fortuna andavo ala mia velocità de crocera de diese chilometri l’ora.

10 febraio:
I altri soferi ga strane abitudini.
No basta che i fa drioman un mucio de segni ma i passa tuto el tempo a zigar. No so cossa che i disi perchè go i vetri serai ma penso che i zerchi de darme informazioni. Se digo cussì xe perchè me par de ver sentido un che diseva “torna a casa tua”. Incredibile: come el fazeva saver ‘ndove che stavo andando? Comunque sia pena che trovo el boton per tirar zo i finestrini me caverò tute le mie curiosità!

19 febraio:
La zità xe mal iluminada.
Ogi go fato la mia prima guidada de note e go dovesto girar sempre con i abalianti impizadi per veder ben. Tuti quei che incrosavo pareva che i sia dacordo con mi perchè anche lori impizava i abalianti e qualchedun ga impizado anche altri fari che i gaveva sul’auto. L’unica roba che no rivo a capir xe perchè che i sonava. Forsi iera per farghe paura a un qualche can o gato. Chissà!

26 febraio:
Ogi go avudo un incidente.
Son entrada in una rotonda e sicome iera un mucio de auti (no voleria esagerar ma me par almeno un quatro), no son rivada a vegnir fora. Cussì son andada avanti a girar in tondo stando vizin al centro, spetando la prima ocasion. Sto scherzo me ga fato girar la zuca e me son s’ciocada sul monumento in mezo ala rotonda. I doveria limitar el trafico dentro le rotonde e far si che ghe vadi solo una auto ala volta!

3 marzo:
La sfortuna me perseguita.
Son andada a cior la machina in garage e, co stavo vignindo fora, go sbalià de fracar el pedal acelerando de bruto inveze de frenar! Go ciapà una machina che passava rovinandoghe tuto el fianco destro. Per puro caso l’autista de sto auto iera l’ingegner che me gaveva da la patente. Un vero signor. Go insistido sul fato che iera solo che colpa mia ma lui, cocolissimo, no’l fazeva altro che dir: “Dio mio perdonime, Dio mio perdonime!”