El can, la pantera e el simioto

Un giorno el can più sgaio de un vilagio african el riva a liberarse e a scampar via. Cori che’l cori el riva in mezo de una foresta e el taca a torziolar finalmente libero. A un certo momento el vedi una pantera che vien de la sua parte con aria minacciosa.

“Vacas’cenzaboia, desso son fregà, devo pensar de far qualcossa”.

In quel el vedi la vizin un muceto de ossi de qualche bestia morta, cussì el cori la vizin e el se meti a morsigar torno i ossi e quando che la pantera xe vizina el disi:

“Ah, che bona pantera che me son magnado!”

La pantera se incioda de colpo, la se volta e la scampa via, pensando:

“Cavoli ma che raza de can assatanado! Meio darse a la fuga!”

Una simia, che la gaveva visto tuto per caso stando su un albero, la vien zo e la ghe cori drio a la pantera e co la la ciapa la ghe conta tuto quel che xe sucesso. Alora la pantera rabiada come no so cossa, la disi:

“Maladeto can fio de una cagna! Questa te me la paghi! Desso te fazo veder mi chi che ghe fa ciapar paura a chi!” Po la varda el simioto e la ghe disi:

“Vieme drio che ‘desso ‘ndemo farghe veder chi che comanda qua!” e i parti verso el can.

Co el can se inacorzi che riva la pantera con la simia, ghe ciapa panico e el pensa: “Maladeto de un simioto spelado! E ‘desso cossa fazo? Vacamare, devo pensar svelto qualcossa”.

Inveze de scampar, el can se senta dandoghe le spale a la pantera come per far finta de no gaverla vista e quando che’l la senti rivar vizin el disi:

“Bruta simia maledeta! Stavolta la copo! Xe meza ora che la go spedida a zercarme un’altra pantera e ancora no la xe tornada indrio!”