in ferie come sul lavor

el diretor xe sempre

el diretor

Un grande diretor de una fabrica triestina, dopo un lungo periodo de duro lavor, el pensa de ciorse una meritada vacanza. Cossa fazo cossa no fazo, el pensa che meio de tuto saria andar a passar una stimana in campagna de su zia Jole a Verteneglio.

E cussì el fa.

El primo giorno de ferie el se sveia intorno le diese, el trova la casa completamente svoda con la colazion pronta sul tavolo de cusina. Tuto el giorno su zia xe pei campi a lavoarar e lui a casa a remenarse. La sera co torna la zia per far la zena el ghe taca:

– Sa zia che ogi me son proprio remenà tuto el giorno, va ben riposarse ma anoiarse me rompi, lassime che te dago una man in campagna.

– Va ben nevodo mio, sa cosa doman ti pol andar in suso a contar dute le bale de fien

L’indomani el se sveia bonora e el va nel campo a far l’inventario. La sera, de ritorno dal campo, el ghe comunica a la zia che in campo xe 119 bale de fien. Contento lu e contenta ela i se acorda per un altro lavoreto pe’l giorno dopo.

– Nevodo mio, diman ti podaria andar in San Paulo a concimar la campagna.

Fresco e vispo za de matina bonora, el nostro dirigente in ferie el parti per la campagna e dopo una lunga e dura giornada de lavor el torna fiero a casa de su zia.

– Me par che ti te trovi ben qua con nualtri, diman ti podaria andar suso in sufita indove che xe un monte de patate e ti le dividi le grande da le picule che dopo le dovarò portar vender in mercato.

La sera del giorno dopo, la zia torna a casa e la va su in sofita a veder cossa combina el nipote diretor e la vedi che tute le patate xe ancora in mucio e el nipote fermo con sguardo de ebete con una patata in una man e una in quel’altra.

– Cossa nasse mio omo? Duti i lavori ti me ga fato pulito e desso ti te perdi drio un lavor cussì sempio!

– Sa qual xe el problema zia, che noi diretori fin che xe de CONTAR BALE e BUTAR MERDA semo bravi ma co xe de cior una decision no savemo cossa far!!!