Davanti del Giudice

Una veceta se vedi costreta a ‘ndar davanti del Giudice per via de una question de barufe col vizin de pianerotolo, insoma una monada che se podeva risolver con una strenta de man ma che inveze i avocati ga strassinà fin de rivar davanti del Giudice apunto.

Scominzia l’avocato de l’acusa che ghe domanda a la vecia:

“Siora Ucia, la me conossi a mi?”

La vecia ghe rispondi: “Mama mia se no la conosso sior avocato, la conosso almeno de quando che la gaveva diese ani e gnanca de muleto, sinceramente, no la me ga mai piasso! La iera sempre un de quei fioi falsi, spiòni che tradissi i amici, che conta floce e che fa dispeti e cussì la xe restà anche de grande. Lei ghe par de esser un splendido, un grande avocato, ma no la se rendi conto che la xe un paiazo, bon solo de missiar carte e de insempiar la gente con le ciacole!”

L’avocato sbianca de colpo e, zercando de far finta de niente, el se volta de l’altra parte e el ghe domanda:

“Siora Ucia, la conossi forsi anche l’avocato de la difesa?”

E la vecia: “Ma sicuro che si, conosso anche lui de quando ch’el iera un fioluz. El xe sempre stà un spuzafadighe che xe diventà avocato a piade in tel daur, el xe una bevandela e ultimamente el se ga butà a zogar con le machinete che magna soldi. Xe un che no riva a star con una baba più de tre mesi ma in compenso a la sua atuale moglie el ghe ga fato i corni con tre babe diferenti e una de ste tre, sior avocato, iera anche sua moglie!”

Per poco che anche l’avocato de la difesa no vadi in svenimento!

El Giudice, a stò punto, el ciama de furia i due avocati davanti del banco e, a vose bassa, el ghe disi: “Se un de voi due tochi de mone ghe domanda a la vecia se la me conossi anche a mi, ve giuro che ve mando tuti do driti in Coroneo!”