LA FORMIGA PRODUTIVA
reale compendio de new management aziendale
![](http://www.tuttotrieste.net/new/wp-content/uploads/2021/10/002_formiga.jpg)
La brava formiga produtiva, felice e contenta lavorava e lavorava cantando.
Un bel giorno xe rivà el Calabron, gestor generale, iera incantà de le analisi del Bacolo supervisor e cussì xe finì col domandarghe anche quadri comparativi e grafici, indicatori de gestion e analisi de le tendenze.
Xe quindi diventà necessario cior una Mosca che ‘iuti el Bacolo supervisor e de conseguenza se ga dovesto comprar anche un novo compjuter con stampante a colori.
La Formiga produttiva e felice la se ga ben presto stufà de cantar le sue melodie e pitosto la se ga messo a lamentarse de tuto el movimento de carte che iera de far.
El Calabron, gestor generale, pertanto, el gaveva capì che iera el momento de cior dele decisioni:
in primis el ga creà la posizion del Gestor de area dove lavorava la Formiga produttiva e felice. L’incarico el ghe lo ga da a una Cicala, che come prima roba la se ga messo la moquette in tel suo ufficio e la se ga fato comprar una poltrona speciale. El novo gestor de area, oviamente, gaveva bisogno de un novo compjuter e quando se ga più de un compjuter xe necessaria una rete Intranet.
El novo gestor ben presto se ga trovà difronte la necessità de gaver un assistente (Zimise, za sua aiutante ‘ndove che i lavorava prima), che lo iutassi a preparar el piano strategico e el budget per l’area ‘ndove che lavorava la Formiga produtiva e felice.
Per gestir la rete de compjuter intanto, se ga reso necessario assumer un Mussato gestor de rete e un server che colegassi tuti i compjuter tra de lori.
La Formiga no cantava più za de mesi e ogni giorno la diventava sempre più fastidiosa.
“Doveremo comissionar un studio su l’ambiente lavorativo, un giorno de questi”, ga dito un giro la Cicala. Ma un giorno el gestor generale, nel vardar i conti, el se ga reso conto che l’unità ‘ndove che lavorava la Formiga produtiva e felice, no rendeva più tanto.
E cussì el ga contattà el Gufo, prestigioso consulente, perchè el fazessi una diagnosi della situazion.
El Gufo xe stà tre mesi in tei ufici e ala fine el ga presentà un report incasinado in t’un mucio de carte e una fatura de un casin de bori, che finiva con: “Xe tropa gente in ‘sto uficio.”
E cussì el gestor generale el ga scoltà el consiglio del consulente, e…
…el ga licenzià la Formiga incazzada che una volta iera contenta e cantava.
MORALE:
- Che no te venissi mai in mente de esser una Formiga produtiva e contenta;
- Xe meio esser inutile e incompetente;
- I incompetenti no ga bisogno de superiori;
- Se, ciononostante, te son produtivo, no dimostrarte mai contento. No i te lo perdoneria mai;
- Inventite ogni tanto una disgrazia, crea compassion;
- Però, se ciononostante, te se impegni a esser una Formiga produtiva e felice, metite in proprio, almeno no i viverà sule tue spale calabroni, bacoli, ragneti, mosche, zicale, zimisi, mussati, gufi e se volemo anche pantigane.
Anonimo Autor
Le bestie citade in sto testo xe puramente casuali
Ai sensi de la lege 675 sulla privacy le bestie che no ghe va ben de esser citade pol richieder la cancelazion