La voseta misteriosa

Un mato el sta per partir con l’aereo ma el senti una strana voseta che ghe disi: “No sta ciapar sto aereo, no partir!”

El mato se volta ma no’l vedi nissun, però ghe ciapa un poco de spago e el decidi de no partir. Cussì, poco dopo, el vien a saver che l’aereo xe cascà e xe tuti morti.

Però lui ga de partir e alora el va per ciapar el treno. Co’l xe in stazion el senti denovo quela strana voseta che ghe disi: “No sta partir, no sta ciapar sto treno!”

El mato ricordandose quel che iera sucesso prima el decidi de no partir. Dopo un poco el senti la notizia che el treno che el gavessi dovù ciapar xe deralià e che xe morti tuti.

Lui però el ga de partir a tuti i costi e el prova andar a ciapar la nave. Ma anche sto giro sempre quela solita voseta ghe disi: “Non sta partir! No ciapar sta nave!”.

El mato se volta e el ghe fa: “Ciò, mi no te conosso, ma quando me son sposà dove cazzo te ieri?”