LETTERA DALL’ALDILA’

eco cossa che pol nasser sbaliando de fracar
anche una sola letera de la tastiera

Una copia decidi de andar in ferie in una spiagia ai Caraibi in tel stesso albergo dove che i gaveva fato la luna de miele venti ani prima. Però per problemi de lavoro la molie no pol partir subito col marì e la pensa cussì de andarghe drio qualche giorno dopo.

Quando el mato el riva ai Caraibi el trova in camera de l’albergo un compjuter impizado con tanto de conession a internet. El decidei alora de mandarghe una e-mail a su molie ma batendo i tasti el sbalia una letera de l’indirizo e, senza che’l se inacorzi, el ghe la manda a un’altra persona.

Solo che quel altro indirizo xe de una baba pena restada vedova che giusto la tornava a casa del funeral del suo povero marì e, per distrar un poco la mente e i pensieri, la decidi proprio de verzer el compjuter e de vardar i messagi che xe rivai per posta eletronica.

Suo fio el riva in casa poco dopo e el vedi su mama distirada pertera senza sensi davanti al tavolo del compjuter e sul video el vedi la e-mail che la stava legendo:
“Cara sposa, son rivado! Tuto ben! Probabilmente te sarà sorpresa de ciapar mie notizie ma adesso anche qua i ga el compjuter e xe possibile mandar messagi a chi che se vol. Pena rivado me son assicurado che fussi tuto a posto anche per ti per quando che te riverà lunedì prossimo. No vedo l’ora de vederte e spero che anche el tuo viagio sia tranquilo come che xe stado el mio. Ah, no cori che te se porti tanti vestiti perchè qua fa un caldo infernale!!!!!”