Un pulioto el ferma un mulòn su una machina che andava a 100 a l’ora in una stradina dove che el limite xe de 30 chilometri orari. Questo xe quel che se ga dito el pulioto e el mulòn:

Pulioto: La me fazi veder la patente per cortesia!
Mulòn: No la go più, i me la ga cavada un do stimane fa co i me ga fermà in costiera che guidavo duro come un scalin!
Pulioto: Ah! Go capì! La me fazi veder el libreto de l’auto alora!
Mulòn: Orca, la machina no xe mia, la go pena rubada!
Pulioto: La machina xe rubada???
Mulòn: Eh si, comunque penso che i documenti sia qua in tel cassetin, me par de gaverli visti co go butà dentro la pistola.
Pulioto.: La ga una pistola in tel portaogeti?
Mulòn: Eh si ah! La go butada la dopo che ghe go sparà a la vecia che guidava l’auto. Go messo el cadavere in baul.
Pulioto: Come??? La ga un cadavere in baul???
Mulòn: Eh.. si!

Dopo che el ga sentì tute ste robe, el pulioto ciama in centrale e tempo pochi minuti riva el comandante.

Com.: Posso veder la patente per cortesia?
Mulòn: Certo! Ecola. (e el ghe mostra la sua patente assolutamente valida)
Com.: De chi xe sta machina?
Mulòn: Xe mia! Eco i documenti (e el ghe mostra i documenti in ordine e regolari)
Com.: Adesso lentamente la verzi el sporteleto del portaogeti. Devo controlar che no la gabi una pistola.
Mulòn: Ma certo! Comunque no xe nissuna pistola (el verzi el portaogeti e no xe apunto nissuna pistola)
Com.: Ghe dispiasi verzerme el baul. El mio collega disi che la ga un cadavere sconto.
Mulòn: Sicuro! (e el verzi el baul de l’auto ma oviamente no xe nissun morto)
Com.: No capisso più niente! El mio collega me ga dito che el la ga fermado e che no la gaveva la patente, che la ga rubà l’auto dopo gaver mazà la vecia che la guidava e gaver butà el cadavere in baul per dopo sconder la pistola nel portaogeti.
Mulòn: Eh si ah, cossa ancora? El ga dito anche che andavo a zento a l’ora per sta stradina?