Chi gavessi mai pensado che una volta scatada sta foto la saria diventada un reperto storico? Va ben che i ga sempre dito che i la voleva tirar zò ma nissun credeva che i lo gavessi veramente fato. Po, un bel giorno del 2004 i ga inaugurà quela nova e pronta che la iera i ga comincià a demolir la vecia che, bela o bruta, la tigniva dentro tanti ricordi de tanti sportivi triestini.

• 

• 

Ma la cara vecia piscina iera stada costruida per no cascar mai zo, cussì l’impresa ga dovù tribolar bastanza per demolirla, tanto che i ga dovudo ciamar una gru più potente per demolir la strutura del teto.

• 

• 

• 

• 

A la fine, toco per toco, la xe sparida e desso al suo posto un piazal se verzi verso el mar per ospitar un parchegio a pagamento e, ogni tanto, qualche bancarela o picia manifestazion. El novo piazal cussì nato xe sta intitolado a Agostino Straulino, un grande velista triestin de origini lussignane.

• 

• 

Ma chi iera BRUNO BIANCHI? Un grande atleta triestin prematuramente scomparso in un incidente aereo ma, se te vol saver de le sue gloriose imprese, struca QUA!

Come se diseva, nel 2004 vien inaugurada la nova piscina Bruno Bianchi e, gnanche farlo aposta la se circonda subito de un mucio de polemiche. La struttura che per la sua completezza vanta el titolo de “polo natatorio” ga tuto quel che una zità de mar devi gaver in favor dei sport acquatici e tuto fato seguindo i consigli de le associazioni sportive e dei atleti che la doprerà. Solo che qualched’un ga pensà de coverzerla de matonele rosa, viola e fucsia, insoma un pugno in tel ocio che solo col tempo i triestini se ga bituà.

• 

• 

Come se diseva, questa strutura vien giustamente intitolada a Bruno Bianchi ma altre degne intitolazioni xe stade fate in questo polo natatorio: una de le vasche olimpioniche al suo interno vien intitolada a Romana Calligaris un’altra Alfredo Toribolo e la terza a tutti i campioni azzurri (clichè sui nomi se volé saver la storia e le imprese de sti altri atleti triestini).

Ah, dimenticavo: davanti sto novo polo natatorio ghe xe una simpatica opera d’arte:

• 

• 

Massimo per TuttoTrieste.net