Sfogo de

un triestin qualunque

Cossa me costava un soriso ieri, su la porta, co ti, delicata e ingenua, te me ga ciolto le mentine senza zuchero inveze che le gome americane?

Cossa me costava un soriso là del canton co una veceta me ga traversà col rosso e go dovù inciodar de bruto?

Cossa me costava un soriso a la cassiera del boteghin co stavo pagando, che per dirme 15 euri la me ga spudacià sui bisi e sul matavilz?

Un soriso demoselo pur, no se fa fadiga, e stasera co magnerò la jota freda pensando che te la ga fata ti con le tue manine dolzi e delicate, cossà me costeria farte un soriso?

E al mio colega che la matina riva tardon e no fa un cazo tuto el giorno, cossa me costassi farghe un soriso?

E anca a sto mona spuzolente che el xe drio a mastruzarme de continuo el pie intanto che son sula dicianove per tornar casa copà del lavor, cossa me costassi farghe un soriso?

Come anca al capo che rompi le toghe de matina a sera, cossa me costassi farghe un soriso?

Certo no me costassi proprio niente…

MA PERCHE’…

SE LI MANDO TUTI IN QUEL PAESE

ME COSTA QUALCOSSA???