Passatempo de pensionati

(no solo cantieri)

Tante volte chi che lavora se domanda cossa che fa i pensionati tuto el giorno, come che i passa el tempo e sopratuto cossa che i combina per spassarsela. El passatempo più in voga par che sia quel de andar a vardar i altri che lavora, specie i cantieri ma xe anche chi va in giro pe’l mondo, chi va a far corsi de lingue o va a impararse a sonar un strumento. Ma el vero pensionato triestin se distingui per el morbin!

Ben, presempio l’altro giorno son ‘ndà con mia molie a far la spesa in zità. Semo ‘ndai in tuna botega e ghe saremo stai si e no diese, quindise minuti, po’ semo ‘ndai fora. Co semo rivai fora iera un tubo col blocheto in man che, come Michelangelo, el piturava.
Ghe semo ‘ndai vizin e ghe gavemo dito:
“la me scusi, ma no la podessi gaver un poco de più rispeto per le persone anziane e lassar star per una volta?”
El tubo no ne ga calcolà gnanche de sbriss e el xe ‘ndà ‘vanti a scriver, cussì ghe go dito che’l vadi a remengo!
A quel punto el ga alzà i oci, el me gà vardà fisso drito e dopo un atimo el se ga messo a piturar perchè iera le riode lisse. Cussì mia molie ghe ga dito che’l iera proprio un toco de mona!
Intanto el tubo, con la calma, el ga fracado le do multe sul vetro de l’auto e el ga comincià a scriver una terza multa perchè una rioda iera in zima al scalin del marciapie, cussì mi ghe go dito che su mare doveva esser una grande lavoratrice e cussì semo ‘ndai vanti una bona meza ora: più lui piturava e più noi lo remenavimo, più noi ghe davimo sacramenti più lui piturava.

Che po’ ve dirò, a livel personale no la gavevimo con el tubo anche perchè mi e mia molie ierimo rivai in zità con la coriera, xe che de quando che semo in pension zerchemo sempre de divertirse un poco, el dotor ga dito che ala nostra età xe importante!