La giusta alimentazion
I disi che ogni giorno dovessimo magnar un pomo per via del fero, una banana pe’l potassio e anche una naranza per la vitamina C e pò una scudeleta de tè verde senza zuchero per prevenir el diabete.
Ogni giorno dovessimo bever dò litri de acqua, magnar un yogurt, cior un’aspirina per prevenir l’infarto e un bicer de nero ma anche un de bianco pe’l sistema nervoso e una bira per la circolazion. Se te bevi tuto insieme te poderia vignir una emoragia cerebrale ma, no preocuparte, te saria talmente carigo che no te se inacorzessi de gnente!
Ogni giorno bisognassi magnar fibre, tante fibre, chissà che no te rivi far un maion in condoto!
Bisognassi far tra i 4 e i 6 pasti al giorno, legeri, senza dimenticarse de mastigar almeno zento volte el bocon. Fazendo un do calcoli, solo per magnar te ‘ndassi zinque ore. Ah, dopo ogni pasto bisognassi anche lavarse i denti, ossia: dopo el yogurt, le fibre, el pomo, la banana, e i 4/6 pasti fin che no te se consuma i denti, e po passarse el fil interdentale e siacquarse co’l colutorio. Xe ben organizarse magari metendo un schermo in bagno visto che diverse ore se dovessi passar in quel logo!
Dopo, bisognassi dormir almeno oto ore e lavorar altre oto che zontade a le zinque che te coressi per magnar semo rivai za a 21. Te ne resta 3, sempre che non te trovi trafico!
Secondo le statistiche, vardemo tre ore de television ogni giorno ma come se fa visto che bisogna caminar almeno meza ora ogni giorno? Atenzion: caminè per un quarto de ora e dopo tornè indrio senò la meza ora diventa un’ora intiera!
Bisognassi mantignir le amicizie, leger e informarse con almeno tre giornai diversi e un do riviste e po almeno un due capitoli de qualche libro.
Ah si, bisognassi anche netar casa, lavar l’auto, far la spesa, lavar i piati, far de magnar, portar i fioi a scola e a ginastica, far la lavatrice, lavarse, petinarse e magari andar anche in condoto (e visto tuto quel che bisognassi bever me sa che bisogna ‘ndarghe anche spesso!).
Insoma, per farla curta, el giorno dovessi durar trentazinque ore!
L’unica possibilitá poderia esser quela de far più robe insieme:
- fate la docia con la boca verta cussì te bevi i do litri de acqua;
- lava pertera vardando la televsion o, meio ancora, scoltando el telegiornale;
- legi i giornai sentado in condoto;
- bevi vin nero o bianco lavorando (poderia esser utile specie dopo gaver sentì le monade del capo).
Za per gaver leto stà monada el tempo tuo per far tuto se ga ridoto de bruto!
Bon, ‘desso ve lasso, perché tra el yogurt, el pomo, la bira, el primo litro de acqua e el terzo pasto con fibra, la banana e le notizie su la politica, devo ‘ndar de corsa in condoto!
Cussì magari za che son, aprofito anche per lavarme i denti!