Una moderna fiaba de Esopo

Una cagoia la sta corendo (per modo de dir) e la incontra una volpe.

La volpe ghe domanda: “coss’te cori come una mata, cossa xe nato?”

“Scampo perchè xe quei de l’Agenzia de le Entrate che me cori drio!” ghe rispondi la cagoia.

“Ma come mai proprio a ti?” domanda perplessa la volpe.

“Sa come che xe, mi go la casa, mio marì ga la casa e anche tuti i fioi ga la casa” fa osservar la cagoia.

La volpe ciapada del panico se meti a corer anche ela. Cori de qua e cori de la, la incontra una simia.

“Ciau volpe, come xe? Perchè te cori?”

“Xe quei de l’Agenzia de le Entrate che gira!” ghe rispondi la volpe.

“Ma perchè i te dovessi spacar i bisi proprio a ti?” domanda curiosa la simia.

“Te vedi, mi go la pelicia, mio marì anche e anche i fioi ga la pelica” fa osservar la volpe.

E la simia co senti stà roba la taca a corer via anche ela.

“Ma ‘ndò te va?” domanda incuriosida una sariandola.

“Scampo!” ghe rispondi la simia “perchè xe quei de l’Agenzia de le Entrate in giro e te sa che noi che gavemo el cul scoverto semo sempre i primi a ciaparselo…”

vedi anche una storia de Esopo in triestin