Un marangòn a Parigi

Un vecio e un poco stanco marangòn el mola la botega e el decidi de ritirarse.
Bori no’l gaveva tanti ma dopo una vita de sacrifizi e de duro lavor el iera rivà a meter via qualche cossa e cussì el va a far el viagio che’l bramava de far de tuta una vita: andar a Parigi.

El sta via dò stimane e el torna tuto riposà, meraviglià e pimpante.

Natural i amici ghe domanda come che xe stà, cossa che l’ga fato come che iera le babe! E lui zò a contar e magnificar tuto!

Quel che ghe gaveva sai fato colpo, però, iera l’inteligenza de le donne. Tanto che una sera in un bistrò (là cussì i ciama i bar) intanto che’l beveva un bicer al banco prima de tornar in albergo, ghe se ga sentà de fianco un figòn biondo, tuta curve, con un vestitin sai bel, anche se un poco atilà, ma poco mal perché cussì se vedeva e no se vedeva, ma se podeva imaginar.

“Ma cossa c’entra questo con l’inteligenza?” ghe domanda i amici.

“Speté!” el ghe intima “Speté! Dovè saver che mi no parlo una parola de francese e go subito capì che la mula no parlava gnanche una parola de triestin e co la se ga inacorto che iera un discorso fra sordi la ga tambascà qualche cossa al barista e el mato ghe ga subito portà un blochetto de carta e un lapis. Te dovevi veder la mula che ben che la se spiegava coi disegni e cole parole scrite. Prima de tuto la ga fato un pupolo de una baba spudada de ela, e la ga scrito soto Julienne, cussì go capido che iera el suo nome. Po’ la me gà disegnà a mi, e la me ga dà el blocco e el lapis pervia che scrivessi el mio nome, mi calcolo. Difati la ga subito capì che me ciamavo Bepi, come che gavevo scrito. E, anzi, la ga comincià a carezarme disendome Bepi, amùr (che per capir quel no ocoreva saver el francese).
E po, inteligente, sai inteligente la iera, la me ga disegnà una tola cola tovaia, do’ biceri, un piato con un polastro e due piati pronti per la zena: go subito capì che la gaveva fame e che la voleva che andassimo a zena insieme. Sai inteligente!
Semo andai avanti cussi per più de un ora fra pupoli, carezze e mace de grasso perché el polastro lo gavemo magnà cole man. Insoma stavo per saludarla e tornar in albergo dopo gaver pagà el conto quando che la me ga ciapà el brazo con una man e con quel’altra sul bloc notes la ga disegnà un leto!”

“Orpo, un leto!” (reazion meraviliada dei amici)

“Certo, proprio un leto! Ve go dito che la iera sai inteligente! Come diavolo la gaveva fato a capir che mi de mestier fazevo el marangòn???”