EL GRANDE MAGAZIN

Un de quei negozi che vendi de tuto, quei che una volta se ciamava grandi magazzini e che adesso va de moda ciamar multi-store, quele boteghe che in pratica ga in mostra un mucio de roba e che te da la possibilità de veder dal vivo come xe fato quel che te vol comprar e de tocar con man la consistenza, in barba a l’altra grande moda de comprar tramite internet.

Cussì girando per la botega in zerca de un certo prodoto, te ghe ne trovi de tanti tipi, colori, formati e materiali fin chè… ecolo… xe lui, eco quel che zercavo: bel, de la giusta misura, nato per esser messo in quel posto che pensavo de meterlo. Fotografa el cartelin e va de la comessa a dirghe che te lo vol:
E qua comincia i longhi contro la tipica comessa triestina!

– in magazin no lo gavemo, la speti che vardo se xe in tel magazin centrale. No no xe gnanche la.

A sto punto me permeto de farghe notar che sul cartelin del toco in esposizion xe scrito “disponibilità immediata”, la xe sicura che no lo gavè?

– No xe e no rivo gnanche a veder se xe in arrivo con la prossima consegna perchè ogi xe sabato.

Domando se xe fatibile ordinarlo e, vedendo la titubanza de la comessa, domando alora se se pol cior via quel che xe in esposizion.

– No se pol! Femo cussì la provi ciamarme un giorno de la prossima setimana che controlo se xe la disponibilità.

Mi no voio far el prezioso ma dato che no iera ciaro quando saria sta el giorno ideale per ciamar, bel saria stado che la me disessi de lassarghe el numero che la me ciamava ela, ma son andà via saludando dopo gaver ciolto el bilieto col numero de ciamar che, con legero fastidio e dopo mia insistenza, go rivà farme dar.

Una volta a casa me xe vignuda la tentazion de veder se sto toco, che no costa proprio do euri, iera disponibile su quel sito famoso che vendi de tuto ma me son trattenudo e son andà inveze a veder el sito de la cadena che fa parte quel negozio e come per incanto lo trovo, disponibile subito, possibilità de farselo consegnar in botega (dove no i saveva se fussi mai rivado) o anche a casa se te xe meio => meti in tel carel => paga subito => grazie per l’acquisto, el tuo toco riverà più o meno verso quel giorno.

E verso quel giorno xe rivado!

Pecà, perchè quela botega me piasi, me piasi come esponi la roba, me piasi l’ambiente, pecà solo che xe in man al stereotipo dei comessi triestini e, purtropo o per fortuna, chi ga creà sti siti internet per comprar on-line, no doveva esser sicuro un triestin!