Causa trasloco, vendo frigorifero con congelator come novo, grupo A, ampi ripiani e comodi sportei, rivestido in mogano con manilie in aciaio.

Comodi cassetini per la verdura e panel porta bibite, luce interna e zatine regolabili in alteza.

Vero affaron, doprado pochissimo e tignudo sempre neto e in ordine, come novo vendo a metà prezo.

Meti in fresco la tua estate, no lassarte scampar una ocasion come questa.

I televisori de le meo marche li trovè solo che de

VARDA E STRICA

l'unica botega dove te pol trovar i più moderni televisori al plasma, a led e a cristali liquidi, con tuti i polici che volè, coi schermi più piati de sto mondo e con la moderna tecnologia 3D.

Imperdibile afaron:

PAGA UNA - CIOL DUE

Per la prima volta in zità una oferta incredibile: due machine per lavar al prezo de una sola. Un concentrato de la più moderna tecnologia in fato de lavatrici ve vien proposte con un simpatico omagio: el bidon per meter la roba de lavar con tanto de pedal per verzerlo co gavè le man piene e cartel de divieto de sosta cussì che nissun ve se pianti intorno co se indaffarai per casa.

Incredibile, sensazionale, imperdibile, unica ocasion de portarse via con pochi schei un formeto microonde combinà, nel senso che chi che lo doprava prima devi gaver combinà un bel casin. Forneto e grilia tut-in-t'un, te pol scongelar el pan intanto che te prepari le globasse, te pol scaldar la zivola intanto che se fa su i ciba. Ideale per chi no ga voia de perder tempo e ghe piasi tuto pronto presto. Sempre tignudo perfeto con manutenzion dele parti eletriche fata domacia. Prezo interessante no telefonar a ore pasti. Cayo Effe.

Sul finir de l'estete, quando tuti se comincia a preocupar che le giornade al bagno sarà un ricordo, eco la proposta ideale per salvaguardar el vostro colorito: un fantastico letin ciapasol per tuto l'inverno. Quando fora sufierà la bora a zento e neve e iazo farà de paroni, voi in'tela comodità de casa vostra poderè abronzarve senza gaver el pensier de ciapar el sugaman e corer a Barcola, o a Sistiana, o al Pedocin o a Muja per ciapar posto e resterè bei neri tuto l'ano. I tochi disponibili xe sai pochi perciò afreteve a ordinar che qualchedun no ve li freghi e ve fazi invidia tuto l'inverno.

NEURO-NIX FORA TUTO!

Grande favolosa oferta solo de NEURO-NIX l'unica botega convenzionada con la neuro.

Svendita totale per inaugurazion del negozio. Lavatrici, sugadori, lavapiati, frigoriferi, frigideri,  televisioni, antene, radio, radioline, transistor, giradischi, mangiadisci e uolkmen de le miliori marche, de tuti i modei, de tuti i tipi, insoma vasta sielta de ogni prodoto in un comodo e acogliente negozio sconto in tela natura, aria bona e sana compresa in tel prezo! Venì a trovarne in tela nostra nova botega in boscheto a vardar de persona la qualità dei materiai e la consistenza dei legni pregiadi dopradi per tuti i nostri mobili e mobileti...

...e per chi che comprerà un dei nostri stupendi televisori, in omagio el mobileto per pozarlo de sora

Profita del periodo invernal per far i tui acquisti per l’estate a prezi vantagiosi. Compara ogi per st’estate un condizionator de aria. Robusto e potente resisti a tuti i maltempi, dal caligo ala bora scura, dal piovon al sol-che-spaca-le-piere. Comprandolo adesso te risparmierà un mucio de soldi e te sarà pronto per afrontar el caldo dela prossima estate. El motor te lo impichemo de fora speranto che nol caschi in strada e dentro ve metemo el split che fa fresco (speremo) e che se impiza strucando un boton e dandoghe un do piadoni.

Dita Thermo-Metro

Imperdibile oferta: ultimo model de sauna portatile, due posti comodi, con le riode per spostarla de una parte e de l'altra. Consuma poca corente e unisi l'utilità de una sauna a la comodità de gaverla in casa e, volendo, de portarla in strada per farghela veder e provar a amici e parenti e sopratuto per farghe invidia a quei che ve sta sule spuze. La podè meter dove che volè: in bagno, in coridoio, in pergolo, in giardin, insoma metela de qualche parte basta che me la portè via...... 550,00 Euro e xe vostra con in omagio un savon de scafa e una piera pomice pei calcagni.

Telefonar Ucio Trapolez

Vendo barbeque in aciaio inox, PERFETO, usado poco, ve assicuro che la carne e el pesse vien rostidi ala perfezion e che su sta grilia vien i meio cevapcici e le meio globasse che se possi sognar. Dotado de aposite riodele che basta darghe un poco de crc e le xe perfete, el pol esser spostado avanti e indrio grazie anche a la maniza per ciaparlo senza scotarse le man. Recentemente revisionado ga superado senza problemi la visita del centro igiene e tuti i test sanitari. Ideale per chi ga giradin, corte, teraza, sotoscala, insoma metelo dove che volè basta che venì a ciorverlo.

Ciamar Aldo Sporco