Vendo belissimo saloto con poltrone e tavolin de legno. Le poltrone xe rivestide in finto veludo maron e el tavolin xe in finto mogano con gambe in ordine (no scantina). I cussini xe sfoderabili e el fondo no xe marzo. Se interessati regalo con el sogiorno anche un vaso finto cinese de la dinastia dei Ciapi Lin Tel.

Ciamar solo se interessadi, se vedè on-line questo anuncio xe ovio che la roba xe ancora disponibile.

Vendo vasca idromassagio e condoto confortevole causa trasloco, usati poco, come nuovi, sempre tegnudi neti e in ordine no come la sigonora Luisa che la comincia presto, la finissi presto e no la neta el cagador!

No perditempo.

FORA TUTO!!!

Ocasioni de no perder da Cusine & Fogoleri, per rinovo locali, svendi tuto a prezi incredibili! Cusine economiche, cusinini, sparker e fogoleri de ultima generazion. Vasto assortimento fin a distruzion.... ehm.... eliminazion scorte.

Apurado che comunque le sdraie in motorin no xe "carico ingombrante", vendo un per de careghete de pineta per chi vol sentarse in ombra co el caldo bati sul coco. Ancora più fazile de un per de sdraie de portar in motorin, legere e manegevoli se le pol strassinar in auto o in coriera, te pol verzerle in qualunque momento e ovunque te se trovi te pol sentarte senza darghe fastidio a nissun. Un bel ordegno per l'estate calda e favoso de la riviera barcolana.

Telefonar a Ucio Fazountocio

Noi no gaveremo la Ferili che pol parlar ben dei nostri prodoti ma le imagini parla de sole: una poltrona come che no la gavè mai avuda e come che gnanche no podevi mai sognarvela. Comoda, manegevole e sopratuto sfoderabile. Disponibile in tinta color vaca furlana, xe l'ideale per comodi momenti de relax grazie al suo cussin spostabile in tantissime posizioni e el schenal studià per chi ga mal de schena, cervicale e siatica. A chi che se la porta via ghe regalo la scartaza per cavar i pei del can.

Telefonar Stanko Di Stirado.

Per spetar con comodo la filovia, impresto carega comoda come la poltrona de casa vostra. Ideale per quele ligne ndove che bisogna spetar tanto tempo la coriera o per chi de abitudine riva tardi e la perdi cussì ghe toca spetar ore e ore che rivi quela dopo. Schanal ergonomico, sentada adata a tuti i tipi de daur, spostabile a richiesta dentro el gabioto in caso de maltempo. Stagna e robusta pol soportar fin zentootanta chili de plucia, insoma una carega talmente de lusso che la gavemo dotada de antifurto pervia che qualchidun no se la porti a casa.

Tariffa a minuto, possibilità de abonamento per chi sa de esser sempre stanco.

Telefonar Toio Canapè.

Afito posto in spiagia per le tue prossime vacanze. Posto riservado con carega de classe, vista mare, a due passi dal mar per poder 'ndar a tociarse. In zona bastanza isolada per no gaver gente intorno che fa casin e poder goderse in pase le ferie. Perfeta si aper chi ghe piasi andar la matina bonora a goderse el sol che nassi, sia a chi ghe piasi rilassarse de sera a vardar el sol che tramonta, sia per chi vol andar in pase senza smania de no trovar posta, sia per chi vol far quel che ghe par. Chiamare solo se seriamente interessadi. Marina Julia

Belissimo tavolin de saloto, in aciaio inox e alumigno, con vetro de cristalo de Boemia e intarsi in oro. Adato sia per chi ga un sogiorno in stile antico sia che lo gabi moderno, sia in stile liberty che stile strafanic, sia in stile rococò che in stile grampa-e-scampa. El tavolin xe de dimensioni ridote ma el se verzi parte per parte fin a diventar el triplo più longo dimodochè podè far bela figura coi ospiti quando che servì i antipasti. Adato per pozar el televisor, pol esser anche sistemado vizin al canapè come portariviste e giornai o meio ancora per pozarse coi crachi vardando el televisor per indormenzarse meio. Raro esempio de funzionalità e beleza.

Telefonar a Sergio Grembano

Vendo set completo de careghe de cusina in legno massel con sentador in paia istriana. Ideale per la casa in campagna o per chi ga un aredamento rustico. Vece ma stagne, xe le classiche careghe indistrutibili, afidabili e sicure anche pei fioi e pei veci. Disponibili in quante che ghe ne volè e in tun mucio de colori e con fazilità de recupero de tochi de ricambio in tel caso puramente ipotetico che le se dovessi romper.

Mobilificio Femotutounlogo

Causa trasferimento vendo scagno de uficio con sentador girabile o girevole o voltabile, come che ve comoda, nonchè asportabile completo de riodele per remenarse su e zo per l'uficio co el paron xe via. Riode imbotide per no lassar striche sui parcheti e frizion a leva per tirarse su e zo col daur come zurli co no se ga voia de lavorar.

Ciamar no sai tardi ma gnanche tropo bonora

Pino Spuzafadighe

Tipica carega model Savonarola, toco raro e introvabile visto che questo iera proprio el caregon del mitico Girolamo. Se riconossi ancora i gratoni de onge sui manighi che el sgrafava co el iera fastidioso. La carega par esser finida a Trieste quel giro che Savonarola xe venudo in zità per veder la Barcolana e sicome che el stava comodo solo che in tela sua carega, pareria che el se la gabi portada drio. El caso ga voludo che un certo Toio Nagana de Rena Vecia ghe la gavessi rubada e de quela volta de la carega no se ga mai savudo più gnente ma se sa per certo che no la ga mai lassdo la zità fina che un giorno la xe saltada fora in tuna cantina de una casa in via Malcanton durante i lavaori de sgombero de un'eredità fati de Ucio Strassariol deto Ingrumatuto.