Bici smarida. Per intenderse go perso la bici no che el color de la mia bici xe smarì. La go persa in zona Pedocin una sera de luglio. Xe una Graziella color arancio con riode rosa e campanel a dlin-dlon. Se el gentile rinvenitor me la riporta me faria un gran favor. Se po el vol portarme al posto de la bici un motorin el me faria un favor ancora più grande.

 

Persa suocera in zona Catinara. Xe una dona bassa e s'gionfa, cavei color sorzo e un brufolo sul naso. Chi che la trova xe pregado de NON avisarme e de far finta de gnente. Se la domanda informazioni o passagi in auto fe finta de esser stranieri.

 

Portafolio con pochissime monedine, un assegno in bianco, bancomat, codice segreto del bancmat, codice segreto de la casseta de sicureza de la Banca de Opicina, codice segreto de la carta de credito, perso in night club zona rive. Lauta ricompensa al gentile ritrovatore.

 

Sacheto de pistaci dimenticado su la panchina del giradin publico, quela vizin el lagheto dei cigni, e mai più ritrovado. I pistaci iera stadi acuratamente speladi e tazadi per esser più facilmente mastigadi da anziana signora munida de dentiera mobile.

 

Persa la speranza. Citadin talian che ga provà a votar tuti i partiti de tute le fazioni

 

Giovane avocato in cariera ga perso la causa contro colega furlan dopo furibonda arringa. Invito tuti i concitadini a ridarme forza, coragio e fiducia in mi stesso in quanto in sti giorni vegno definido l'avocato de le cause perse.

 

Smarida borsa de le Coop contenente 150.000 Euro in contanti in zona Borgo San Sergio/Altura/Rozzol Melara...o forsi anche in zona Cavana. Lauta ricompensa a chi me la porta indrio (10 Euro).

Contatar Sior Tiraca Ingenuo

 

Andando zo pe'l corso (ai bai tu me la darai!) go perso una flon-flon. Chi che la trovassi pol tenirsela che con quel che me costa mantignirla beata l'ora che la go persa. Una prima volta ghe go corso drio, la me ga tirà un s'ciafon, po un sgrafon fin che la go becada in t'un porton e, sicome ghe go tirado su el sipario, la xe andada a ciamar le guardie e i me ga ficà in canon. Insoma solo che rogne con ela visto anche che dopo nove mesi la me ga conzà Giovanin capo banda del casin. Insoma meo perderla che trovarla

 

No so se go perso la borseta o se i me la ga rubada. Quindi se qualched'un la trova lo prego de ciamarme subito perchè go tuti i documenti dentro Se inveze la me xe stada rubada pregheria el gentile ladro de pagar le bolete scadude de l'Acegat e dela Telve che el gaverà trovado dentro. A bon render! Milvia Cista

 

Causa improviso refolo de bora, go perso el paruchin in zona Opicina ma dal refolo el podessi esser rivà fin a Roian. Xe un tupè de otima fatura riconoscibile per l'odor de brilantina che uso 'positamente per render più vera l'ilusion de no esser senza un pel. Al gentile rinvenitore ofrirò un spriz.

Ucio Spelon.

 

Persa la testa per una baba in osteria de Pino. Da quel giorno no bevo e no fumo più, me lavo, me improfumo, me petino e coro in osteria nela speranza che la torni. Prego la gentile signorina de farse viva e de tornarme quanto portado via.

 

El frate ga perso le zavate, chi le ga trovade? ....