PESCANDO

De picio, nei ani trenta,

stavo coi noni

in zitavecia,

una vita sai strenta.

me piaseva sai pescar

e quasi ogni matina

andavo a gironzolar

zo in marina.

no iera sai distante;

stavimo in via del Pozzo Bianco

propio drio de Piaza Grande.

con do`metri de fil involtizà

su un quadratin de suro,

do balete de piombo,

e un amo sgangherà,

tentavo come un mato

de ciapar

qualche guato.

pescava tanta gente

ma mi no,

no ciapavo mai gnente;

e co tornavo a casa, 

stufo de pescar,

la in Sacheta,

mia nona me diseva

"hai pigghiato lu pisce?"

(la iera de Barleta)

e mi ghe disevo:

nona che scalogna,

lo gavevo quasi in man

e sul piò bel

se ga roto la togna!

ela, che la saveva,

la me dava una carezza

e la rideva.

La me voleva tanto ben!!.

Pino Peschechera

Melbourne (Australia) 1998