L'ALBERO DE NADAL

L'Albero mio xe sempre stà sai bel,
perché iera un artista nel farlo mio fradel.

Però co lo vestiva dovevimo sparir, 
perché lo fazi in pase filavimo a dormir.

A volte dopo fato no'l iera sai convinto,
forsi saria stà meo se'l fossi stado finto:

perché nissun pensava al povero Albereto
che'l stava cussi ben, piantà nel suo boscheto!

Prima de taiarlo e'l iera tanto bel
coi rami profumadi, la ponta verso el ciel.

La piova lo bagnava, la tera lo nutriva, 
la neve lo imbiancava intanto che'l dormiva.

E'l sol in Primavera lo scaldava,
gemete verde palido sui rami ghe spuntava.

La gente no ghe pensa, xe vecia tradizion
de ciorlo, de adobarlo, e meterlo in canton.

In zima va la ponta, sui rami le lucete, 
e tute colorade se impica le balete.

I fioi guarda contenti, nissun no resta mal
co' i verzi i pachetini nel giorno de Nadal.

Le Feste xe passade, ormai no'l xe più bon:
el vien spoiado tuto e butado in scovazon!.

TULLIO PICCINI   

Trieste