ANNA DEI GATI

L'alba no xe spuntada, xe pochi per la strada :

do borse per la man, la cori imbacucada!

'na borsa pe' i colombi, e una pe' i gatini

pol esser bora o neve, la va zò co'i iazini.

No la gà mai mancado a questo apuntamento:

paston de pesse ai gati, pe'i colombi frumento!

Xe gente che capissi e'i la iuta nel rion,

e altri che ghe ziga che la fa scovazzon!

No la xe tanto giovane, ma la va a lavorar

perché queste bestiuze le gabi de magnar. 

La frega ufizi e scale, la fa qualche porton,

per mantignir le bestie la spendi la pension!

El pesse costa caro, el gran la ciol a quintal,

a questa dona bona chi pol volerghe mal?

Fin che la gà salute le bestie magnerà, 

e co no la pol più Idio provederà.

I gati guarda in alto, xe fame de matina,

Anna ga dovù 'ndar in Clinica a Cortina.

Le bestie gira a svodo, le prega San Francesco

che la guarissi svelta e che la torni presto.

Adesso la stà meo, el mal ghe xe passà, 

merito dei dotori che'i la gà ben curà.

I colombi svola in pergolo, xe tuto un remitur,

xe stà quasi un miracolo e Anna la va a Lurds ! 

TULLIO PICCINI

  Trieste