LA VECIA BATANA

In un canton del porto dormiva una batana,
el suo paron xe morto de più de una stimana.

Parenti no'l gaveva, sola la xe restada,

nissun no vol comprarla, i la credi scalognada.

La gente co passava no la ga mai badada,

perché la xe brutina e meza scortigada.

E pur per tanti ani fra piova e sventolade,

i gà pescado assieme, fazendo notolade.

Dopo levà la rede, d'argento la brilava,

colma de sardeline, che tute se squamava.

Ormai la xe per intrigo, fora i la gà portada,

do colpi sul fasciame, e po' la xe sfondada.

Però la xe contenta de esser in fondo al mar,

a nuvoli i sardoni vizin la va guardar.

Saria la giusta fine de tute le batane,

cussì le diventassi pei pessi tante tane!

  TULLIO PICCINI   

Trieste 1988