LA MIA CORTE

Streta fra quatro case iera la corte mia,

divisa de do muri, el giardin de un'osteria.

Quatro, zinque fameie, per tuti un solo cesso,

altro che do servizi come che se ga 'desso !

No se sentiva auti, no iera confusion,

fazevimo noi gheto zogando col balon.

Cantava sempre un galo, opur baiava un can,

tante fameie, streti, però tuti a la man.

Iera siora Lucia con Ciano, Sergio e Argia,

la iera la più brava de far economia.

I risi zà ale diese sul fogo a cusinar,

co iera mezogiorno iera cossa magnar.

La nostra portinaia mai co la scova in man,

ciamada la "Tetona del Toro Padovan".

E iera siora Paola con Bruno, gente bona,

essendo senza fioi, i ga 'dotà l'Androna.

Mia mama Dorotea, vedova con tre fioi,

l'andava a fregar scale per mantegnirne noi.

Le case tut' intorno vizin, quasi tacade,

de su i vedeva tuto, proibido far monade.

E dopo lavà i crepi, de sera coi scagneti,

le babe ciacolava, in brazo noi muleti.

Le contava monade sucesse nel rion,

però iera 'sai meio de la television.

I tempi iera duri, magnar de borsa nera,

ma cossa volè far, xe robe de la guera.

Xe passai tanti ani, adesso el cul xe pien,

però ricordo sempre quel buso al pianteren !

  TULLIO PICCINI   

Trieste