EL GATO PATISSI

Sto estate son 'ndà a Guilmi su in colina,

con mio fradel, cognada e moglietina.

Xe un paeseto sora un montisel,

el tempo qua xe quasi sempre bel.

Stemo in una caseta proprio bela,

de fronte a noi gavemo la Maiella.

Sto paeseto tuto de casete,

xe abitado solo de veciete.

I omini xe pochi, perché per lavorar,

i devi andar all'estero, o emigrar.

Ogni ora la campana da i rintochi,

rumor quasi no esisti, fioi xe pochi.

Ogni ano i fa la festa Settembrina,

se bevi vino coto, se magna Ventricina.

Una matina fora sul scalin,

vedo rivar su un gato crepalin.

Do ossi, solo pele, el par un spin,

lo ciamo per butarghe un boconzin.

El vien pian, pian, el par che'l staghi mal,

me par de veder quei de Buchenwald !

Ghe meto un scudelin co' un fià de late,

el leca pian, no ghe par proprio vero.

Ghe slongo un tochetin de bon formagio,

el taca a ronchisar, ghe par un miragio.

El magna boconzini lenti, lenti,

adesso vedo che ghe manca i denti.

Dopo magnado par che'l me ringrazi,

mai visto in sto paese gati sazi.

Ma verso sera in scuro ne l'andron,

el se remena dentro el scovazon.

Ma pena che lo ciamo el me capissi,

mi lo batezo subito << PATISSI >> !

Per un meseto robe bone el ga magnà,

tanto xe vero che ' l se ga refà.

Ma se sto Inverno farà tanto fredo,

rivar in Primavera no lo vedo.

TULLIO PICCINI   

Trieste