LA MELAIDA

Mi son famosa per esser intrigante,

sardoni o sardele però ciapo tante.

O grossa o fina son piena de busi,

e co me sbrego, svelti i me cusi.

Su la coverta bagnada i me sbati

e per netarme xe roba de mati !

In ogni stagion vegno calada,

dei piombi verso el fondo son zucada.

Sureti longo el spago go tacai

e per trovarme i meti do segnai.

E se passando qualche elica me taia,

in mezo al buso fa liston la minudaia !

A volte mi dispeti so far bei,

tacà go solo alighe e crostei.

Ma quando el pescador in mi gà fede

vegno su piena de sardoni, son la : << REDE >> !

  TULLIO PICCINI   

Trieste