EL SCOVAZIN DEL MAR

Go l'ala bianca, grande, e mio xe el ciel,

co svolo in alto i disi che son bel.

Le piume sempre bele, ben curade,

co vedo de magnar fazo pichiade.

A volte vegno quasi soto bordo,

e se xe de magnar son proprio ingordo.

Me meto a popa e speto, son paziente,

de quel che vien butà no scarto niente.

Se vedo pescar un guato o un bel sacheto,

taco nudar e più vizin me meto.

Mi so che quel pesseto vien butado,

perché dal pescador el xe scartado.

Se vedo un mio parente sai vizin,

sbato le ale e fazo un gran casin.

De solito per darme el pesse scarto,

el pescador me ciama: Marco, Marco.

Sto nome no me sona gnanca mal,

però el mio vero nome xe << COCAL >>

  TULLIO PICCINI   

Trieste