I SGOMBRI IERI E OGI

Ale babe, scombri scombri de panola!

"Ma dove xe sta panola, forsi in Cabiberia"?

Ma no siora, vol dir che i xe nostrani,

ciapadi a traino dai nostri Barcolani.

Solo i più veci se ricorda le pescade,

che vigniva fate da Barcola al Canal.

Co'i vigniva in tera in zerca de magnar,

la minudaia a gala zercava de scampar.

Vizin de la Maritima, in curva sul canton, 

veci, muleti e babe pescava co'l sardon.

Ma ano dopo ano i ga tacà sparir,

la pesca del scombreto ga incomincià morir.

Ma proprio l'ano scorso un Concorso xe sta fato,

che'l pesse azzuro a tavola xe un piato prelibato.

I parlava dei sardoni che i iera tanto boni,

sardele e papaline in ricete genuine.

Vigniva organizade serate pe' i locai,

ma i poveri scombreti xe i più dimenticai.

Forsi sarà sta un caso, ma i se ga vendicà,

sto ano a nuvoleti in Golfo i se tornai.

Sti giorni se se guarda vizin la diga vecia,

xe un ciapo de barchete che buta sbrumo in mar :

i scombri cori a nuvoli e po i se fa ciapar.

Speremo che qua i resti, no'i staghi più andar via,

tuto sto azzuro a tavola me fa vignir alegria.

Do foie de radicio, fasoi, un bicer de vin,

quatro scombreti rosti e per mi xe za un festin.

Da luglio fin settembre te vol n'dar sul sicuro?

Fate un bon frito misto, però de pesse azzuro !

  TULLIO PICCINI   

Trieste, 1988