LA SOLITUDINE

Girava nel rion un povero veceto
In man un bastonzin, e sul brazo un sacheto.

Spesso el fazeva tapa zercando nei bidoni,
misciando le scovazze el trovava tochi boni.

Le babe lo guardava, el fazeva compassion
vederlo remenar dentro del scovazon!

La carità in soldini no la ga mai voluda,
no'l iera de quei tipi che ciol per la bevuda.

Se inveze i lo ciamava invitandolo a magnar,
te lo vedevi svelto la strada traversar!

No tanto per la fame, ma per star in compagnia,
se po' un ghe dava bado, no 'l saria andà più via!

El conta che'l xe vedovo, ma che do fioi el ga vù:
però le gnore in casa no lo ga mai volù.

El dormi pei cantoni in qualche scatolon,
no tanto per bisogno, perché el ga la pension.

Ministri opur Politici dovessi anche pensar
ai poveri veceti che no ga dove andar.

A volte i veci intriga, però scolteme fioi:
el tempo cori svelto, e presto toca a noi!

TULLIO PICCINI   

Trieste