I TRE RE

Toc toc! Chi xe? - Semo i Tre Re,
vignudi dall' Oriente per < imbroiar > la gente...!

Noi muli cambiavimo la frase e se rideva
per veder se la gente se acorzeva.

Se andava za in Dicembre, e fin l'Epifania
le done ghe piaseva sentir sta mularia.

Più volte un ne mancava e se cantava in dò,
trovavimo la scusa che un xe restà zò.

Le babe domandava: - El terzo muli bei ? -
noi svelti rispondevimo: - El terzo tien i Camei ! -

Sintindo la risposta le petava 'na ridada,
la man 'ndava in tacuin: do fliche le ne dava!

Dovevimo esser furbi, zercarse un bon rion
de gente generosa, e no sia guardà el porton.

E dove nei portoni i gaveva i portinai
no se cucava bori e vignivimo scassai!

La gente tropo rica no vol essere disturbada,
i guarda dentro el cucherle e la porta sta serada.

Un giorno su 'na porta una siora emozionada
la ne ga fato entrar, pianzendo disperada:

- Vigni, vigni, fè pian: cantè in sta camereta
che xe una picia inferma, povereta. -

La picia ne scoltava co'i oci spalancai:
de mezo soriseto semo stai compensai!

'Pena rivai in strada e visto el ciel seren,
gavemo taca corer, contenti de star ben!

A volte se ciapava sai soldi in osteria
dei mati mezi duri che iera in compagnia.

Coi soldi che ingrumavimo, cantando noi muleti,
compravimo carobe e fiepe a scartozeti.

TULLIO PICCINI   

Trieste